أنا صاحية ..و رايقة ..و مبسوطة .. و فاضللي نص ساعة كده و أدخل في مزاج التهييس ..و الصراحة أنا تقريباً مش فاكرة امتى آخر مرة كنت فيها في حالة شبه دي
الساعة الرابعة صباحاً بتوقيت القاهرة ( و مليش دعوة بالمقيمين خارجها ..يتصرفوا همه بقى ) .. و لأ مش قاعدة بعد النجوم كما قد توحي مدونتي السابقة .. لأسباب عديدة أهمها أن معنديش شباك بيبين أكثر من متر مربع من السماء ..و ده يخلي عد النجوم يخلص بدري ..غير اني اساساً عمري ما شفت نجوم تتعد في سماء القاهرة اساساً ..مما كان يمكن ان يكون مؤسف جداً لولا انني من رواد الريف و شفت من النجوم و الشهب و ما غيرها من اللي نقعد نبصله بس ( من غير عد طبعاً) لحد تاني يوم الصبح من بدون ملل .. بالذات في اليالي غير المقمرة ..
هو ايه اللي ودانا للنجوم .. ؟؟ اه كنت بقول الساعة الرابعة صباحا بتوقيت القاهرة ( بقت اربغة و عشرة على فكرة .. بطىء بطىء انا عارفة ) المهم .. لا بعد النجوم و لا بفكر في اللي ناسيني .. و لا برسم و اخطط لرحلة أخيرة مع اصدقاءي العزاء قبل الوداع الأخير ( هنودع بعض ان شاء الله , بس ده مش معناه أن انا هودع الكلية السنة دي )
الكلية .. فكرتوني .. اه .. علشان كده أنا صاحية .. لوحدي في البيت أمام جهازي العتيق اللي أنا قلقانة عليه من السهر لا يتعب اكتر ما هو اصلاٍ تعبان .. مشروع التخرج مسهلرني للصبح في الأسبوع الثالث من الترم التاني ..أمال في شهر ستة هعمل ايه .. ادي عيب اللي يشتغل مع دكاترة محترمة .. شغل بزمة .. و أعمال سنة .. و تقارير .. ( و الغريب أني مبسوطة .. انا أكيد تعبانة أوي ) ... المهم .. دعواتكم معانا يا سباب .. و يا رب مندمش علي 5 سنين 4و نص منهم طاروا عالفاضي ..
معلش طولت عليكم .. سلام بقه علشان ألحق أخلص
ليست هناك تعليقات:
إرسال تعليق